شلون لقيتوا سوريا ....

[kh.ri]

مرحبا إخواتي وأخوتي المغتربين

طبعا الموضوع بعتقد واضح من العنوان

بعد ما عشتوا فترة لا بأس فيها هون بسوريا وزادت معرفتكن بأهلها وأماكنها و كل شي فيها

شلون كان انطباعكن عنها .........انبسطوا ولا لأ .؟؟؟

بتمنى من كل مغترب يشاركنا برأيو وبتجربتو يلي مر فيها بعد ما ترك أهلو وأخواتو ورفقاتو ورجع لبلدو الأصلي

طبعا أنا بعرف أنو الأغلب منكن من أصل سوري بس أنا هدفي أعرف مشاعركن بالغربة عن الأهل وانطباعكن

عن سوريا وكل شي فيها

وبتأمل لاقي مشاركاتكن ....

وعلى قولة n.sham دمتم

[haidy]

ويللي من أصل سوري وعاشوا كل عمرن بالشام ما بيقولوا رأيهن

[مرفأ الأحزان]

الشام حلوه كتير بس العيشه فيها صعبه
يعني كل شي فيها صعب ومتعب بدك وقت كتير لحتى تحقق او تنجز شي و توصللو,بعكس دول الخليج
هنيك بحس انو نحنا دائما معنا مصاري ودائما فينا نعمل اي شي بدنا ياه ونوصللو بطريقه اسرع من هون بالشام
بس بصراحه انا كنت حس دائما انو في شي ناقص
ولما نزلت عالشام عرفت انو الجو بالشام احلى , الطبيعه والخضار والحياه الاجتماعيه وخصوصي انو الكل من جنسيتك بتفهم عليهو وبيفهم عليك فمافي داعي للخوف او الاحساس بانو في حواجز وقت المهامله معهن, بس بضل كل بلد الها طابع خاص فيها بس بالنسبه الي انا بالوقت الحالي بفضل اني ضل وادرس بالشام اما مستقبليا وقت الشغل ما بعرف
مشكور خالد.

[wazzz]

والله شريك انا لقيت سوريا بتجنن الواحد وبتمنى مرفأ الأحزان ما تتركنا السنة الجاية منشان هالكم سوري

[N.Sham]

أهلا مستر خالد زمان عن هالقسم

بالنسبة للموضوع ورأينا بالشام بعد تجربة العيشة فيها :

بالنسبة إلي فانا كنت متحمسة كتير للنزلة لانو الحياة الاجتماعية بسوريا شي نحنا ماشفناه برا بس لما انزلت انصدمت بكم شغلة ماكنت متوقعتون بس بالأغلب كنت كتير راضية ومبسوطة بالعالم اللي حوالي بالمكان وبالعادات الجديدة اللي اتعرفت عليها هون وهالتجربة غيرت كتير اشياء فيني يعني نور قبل سنة اكيد مختلفة كتير عن نور هلأ وللأحسن

بس قصة البعد عن كل شي بتعرفوا عن اهلنا واصحابنا اللي هني فعلا كانو رفقة عمر هي قصة متعبة كتير ويتقتل اشياء حلوة فيك يعني انا بس لو كانو اهلي هون كانت هالسنة رغم كل التعب اللي فيها رح تكون احلى سنة بحياتي لانو متل ماقال نور هلأ نحنا عايشين مع عالم كلون متلنا مو بمجتمع فيه من كل قطر أغنية وبعدين العيشة هون فيها بكل يومشي جديد يعني مو روتين الغربة انو بحكي عن حالي بالإمارات كان اذا دق جرس الباب عنجد ارتعب انو مين جاي لعنا ومدري شو وافتح ولا ماافتح بس هون خلاص عايش مع العالم البيت معبا وجو الجيران والأهل هيدا كلو منو موجود برا

ومن الميزات كمان انو هون في فصول اربعة وطبيعة غير البحر واشياء كتير حقيقة مو مزيفة او حلوة زيادة عن اللزوم

بس كمان لنحكي حكي منطقي لو كنا عايشين هون اكيد مستوى الحياة اللي هلا عايشينها ماكنا رح نلاقيها وفق الأوضاع الاقتصادية اللي عم تمر فيها البلد ( لسه تاثير القومية ) , يعني حماسي لانو كل عيلتي ينزلو لهون خف شوي يعد تجربة العيشة هون لانو مابعتقد انو ممكن يقدروا يعشوا متل العالم اللي حوالينا هون بالشام

وبس , طولت كتير sorry

[the master]

الله حيو أبو الخل
والله سؤالك كتير حلو ومحير بنفس الوقت..
يعني في شغلات كتير كتير تغيرت عليي وفرقت معي..
ومتل ما قالت نور انو أنا مو أنا يعني أيهم قبل سنة غير أيهم اليوم..
والله تغيرت كتير وتعلمت شغلات كتيرة من هالكلية ومن الحياة هون وخصوصاً انو كنت لحالي وسأبقى في السنوات القادمة ان شاء الله ..
فلما بتعيش هيك تجربة بتتعلم شغلات ما كنت تتوقع بيوم من الأيام انك رح تتعلمها ..
يعني أنا والله بزماني ما كنت اتوقع انو اتعلم الجلي أو الطبخ أو هيك شغلات..
ومن نواحي تانية شفت سوريا كتير أحلى من يلي كنت متصورو..هلأ أكيد في صعوبات بالحياة وهاد الشي طبيعي لأنو انتقلت لبيئة جديدة وحياة غير..
وأحلى شي الجو هون بجد يعني والله بالإمارات كنا ما نشوف غير الصيف والشوب..هون بشوف الواحد كل الفصول..
العالم غير هون..هون بتشوف كل أصناف العالم..المنيح والسيء والندل والطيب وكل الأنواع..بس والله الشهادة لله كليتنا العالم يلي فيا كتير مناح والله ما شفت منن شي أبداً بالعكس كلن أكابر والله..
بس أحيانا برات الكلية بلتقي بعالم بكرهوني شوي بالحياة هون يمكن نفسيتن هيك لأنو الحياة هون أصعب من الإمارات يعني بالإمارات العالم كنت حس انن ألطف شوي بس كمان هون لا تخلو من العالم يلي بخلوني صامد هون.. والحمد الله الله جمعني فيكن لأنو والله ما لقيت متلكن والله..
صدقوني انو يا جماعة ماني قدران عبر عن فرحتي بجمعتنا الحلوة ..
وبظن هيك بكفي لأنو طولت عليكن شوي

[الأمير]

خلوووووووووودي يسلم هالإيدين على الموضوع... ورح رد بس رح يكون طويل.... بس لريح... من السفر... وانا ردت مشان تعرفوا وتتحمسوا اني راجع....لرد

[algeria]

السلام عليكم
انا يمكن عشت أقصر مدة في سوريا - 4 أيام بس- و لله الحمد بلد رائع ومختلف تماما عن الجزائر في كل شيء ، يعني فيك تقول من ركوبك سيارة المطار الى آخر شيء ، كل شيء مختلف و الصراحة انا تجولت شوي بالشام حقيقة رائعة جدا جدا ونفسي ازور الحارات القديمة وهي الشغلة راح تكون ثاني شغلة راح اعملها بعد عودتي ان شاء الله ، انا كنت مقيم بالفندق وفيه ملل كثير وما فيه اي شيء بس لما خرجت للناس والله تحس انك وسط ناسك ولو انو شوي اللهجة تغيرت علي --- جزائري اصيبل -- وان شاءالله الرجعة على سوريا بعد 3 ـأيام وربنا يكتبنا الخير وين كان .. سلام

[black angel]

لك تسلم خالد على هالموضوع الحلو...
ومتل ما قال أيهم المحير بنفس الوقت؟؟...
طبعا الحياة كانت كتير صعبة بداية الأمر ....؟؟؟ وكنت كتير إتدايق وخاصة إني ماكنت حابب هالفرع بنوب وكنت معارض... بس بالأخير بضل نصيبي والحمد لله على كل شي ....
أول شي سورية حلوة وما فيننا ننكر هالشي وأصلا ما في وجه مقارنة بينا وبين دول الخليج بتضل ريحة بلدنا....
طبعا أنا الوحيد لأهلي من فئة الذكووور .....فيمكن هاد الشي أثر علي ببعدي عنون ما بنكر إني كنت مدلل أكتر ولهلق الحمد لله مدلل
الحياة لوحدي بما إني ساكن لحالي كتير كئيبة لإني أنا بحب الحياة الإجتماعية وبحب إحكي مع الناس ما فيني ضل لحالي بالبيت ...
وكمان صار عندي كل خميس جلي وتنضيف البيت وغسيل كل هاد إجا مرة وحدة .....
أما هناك الشغالة ( اللفاية) بتساوي كل شي مو إنت؟؟
الحياة حسيتا بدول الخليج أحلى من ناحية إنو بتضل مرتاح ما في إزعاج بنوب من ناحية إنو أهلك بفرغوك للدراسة وما عندك شي تاني....
ومن ناحية الناس هني بضلووو غير بس ماكنت حب شغلة وحدة بالشام إلي هي نقل الحكي لإنو الناس بتملح وتبهر وبتنقل الحكي ...
وخاصة كترانة الغيبة والنميمة بين البنات.... بالأحرى مو بكليتنا,.....
وكمان متل ما قالت نووور ما بتصور يوم من الأيام يجو أهلي عالشام ونضل ساكنين فيا لإنو الحياة فيها صعبة كتير وخاصة بعد الغلا....والأوضاع الإقتصادية كتير متدهورة .... الله يعين أهل الشام عليها

[3loshios]

بلخص تجربتي وعيشتي هالسنة تقريبا بجملة :

(( إن لم تكن ذئبا أكلتك الذئـــــــاب))

[الأمير]

مممممممممممممم .. صار دوري لأحكي بس انا حكيي كتير ها,,
هلأ الحياة الإجتماعيه الخارجيه الحمد لله بعتبر حالي إلى حد ما نجحت فيها وقدرت انو كون صداقات حلوة ورائعه وكتيرة بنفس الوقت...
يعني ممكن بالعيشة الخارجيه قدرت اتأقلم مع الوضع خاااااصه الترم التاني لأنو الاول كنت انا مابدي رفقات لأنو بعرف حالي انو رايح ورح انحرق علين... بس لما عرفت اني رح كمل... خلص حاولت انو اثبت نفسي بشكل قوي .... دراسة الفصل التاني ممتعه لحد الثماله ولو كان 12 ماده بس متعة العلم ..غير ..... اما التعب يلي تعبتوا ما بينوصف بس الحمد لله على كل حال...
يعني طلعات فوتات درساة الجامعه دراسة ببيت واحد من الشباب بيعرف حالو.... كانت رااائعه ومسليه .... وخاصة كروسان الشوكولا والعجوة بعد الجمعه.
اما عن الحياة الإجتماعيه ... انا بالفصل الأول اكااااااد كون برا البيت 95 بالميه يعني الفصل الأول كنت عامل البيت للنوم طبعا وقتي مو برا بالشارع ظروف يعني ....
اما الفصل التاني تعب جدا بالبيت يعني ما ارتاح ابدا ليش ما بعرف بس يعني لسى بحس بعدم الإنتماء بعكس الجامعه....والدراسة بالبيت سيئة جدا والشباب يلي اجو لعندي بيعرفوا هالشي.... يعني كان مافي وسيلة ترفيييييه ابدا ابدا غير هالنت...
ما بدي طول متل ما وعدتكن بأول الرد... بس إذا استجد شي واتذكرتو رح ارفقوا ان شا الله.........
ملخص المخلص لولا الله ثم رفقاتي كانت العيشة مالها طعم ابدا...

[likenoothers]

حلوة ...
حلوة بأهلها حلوة بالبساطة اللي فيها
الأعياد فيها حلوة
كل رفقاتي سوريين هي أحلى شي


ازا بدي روح مشوار فيني اطلع اركب باصات - مكاري و روح عالمكان اللي بدي ياه
بالسعودية مافي باصات ومكاري و مستحيل يقدر يمشي الواحد لأنه الاماكن بعيده عن بعضها
و أصلاً بيدوب من الشوب ازا بدو يمشي بالشارع مشان هيك بكل بيت اجباري لازم يكون عندهم سيارة

هنيك بخاف امشي بعز النهار لأنه المجتمع السعودي مجتمع مغلق يعني الشب السعودي مو متعود كتير يشوف بنت عم تمشي لحالها بالشارع
فاجباري ابي اللي بوصلني على الاماكن اللي بدي روحها




نزلتي عالشام كان قراري انا اللي كان بدي ادرس معلوماتية حتى أول محاضرة حضرتها كانت مبادئ عمل الحاسبات رجعت عالبيت كتير فرحانة وانه حلوة وسهلة و طاير عقلي بانه عرفت اختار الفرع بس بعدين ماعاد عادت سهلة وحلوة متل ماتوقعتها


أكيد الفصل الأول كان كتير صعب بالنسبة إلي
الفصل الأول استفأدت كتير لأهلي
كنت كل مابدي امسك شي محاضرة و ادرس اتذكر اهلي و رفقاتي وما اقدر كمل دراسة روح نام يمكن أكتر من نص الفصل راح بالنوم
رفقاتي اللي هون ساعدوني كتير معنوياً الله يعينهم كنت احكي معهم عشر ساعات عالتلفون لأنه كان يديق خلقي كتيييير

كنت اتدايق من العجقة وعدم التنظيم اللي بالبلد
لا بالشوارع ولا بالجامعة ولا بأي معاملة بدك تساويها يعني مسلاً بكل بلد ازا عندك معاملة بدك تمشيها مو ضروري تنزل عالمكان الرئيسي أو المركز مشان تمشيها أكيد بكون في أكتر من فرع أولاً بتخف العجقة على هالمركز وتانياً ازا الواحد ساكن بعيد عنه شوي بيكون في واحد تاني اقرب إله
يعني كتير شي مزعج
هلأ تعودت و متل مابقولوا اندعكت


الواحد بهالبلد ضروري يتعود على كتير شغلات مشان مايصير معه انهيار عصبي




أكيد صعب على كل عيلة طلعت برا سوريا تقدر تعيش فيها هلأ أهلي مشان يحببو اخواتي الصغار بسوريا عم ياخدوهم على كسب و اللادقية وطرطوس وصافيتا
و مابعرف لوين
بس فالج لا تعالج أول مامنرجع من المشوار بقلولن لأهلي يلا امتى بدنا نرجع بقى عالسعودية

[الأمير]

بس فالج لا تعالج أول مامنرجع من المشوار بقلولن لأهلي يلا امتى بدنا نرجع بقى عالسعودية

متل اخواتي بالضبط.........
متل وقت كنت انا بالسعوديه الن يلا إيمتى بدنا ننزل على الشام...

[bardello]

عشت 7 سنوات بسوريا... ما شبعت على العروبة.. رح زوركم قريبا انشاءالله..

[βăŋŏǾťą 3ąšŝăł]

بإختصار ..

حلوة يا بلدي

بحلوها وبمرها بتبقى بلدي وبيبقى هدول أهلي وناسي ومهما صار هي بلدي ..

وشعاري وين ما كنت { سورية وبفتخر } ~

وبالسعودية لمن بيدروك إنك سوري بتلاقي الشخص بتلمع بعيونو نظرة احترام مميزة إلك سبحان الله .. طبعا مع احترامي لكل الجنسيات بس هالشغلة حسيت فيها كتير وحبيت قولها

وشكرا لصاحب الموضوع :)

[أبوحميد]

سوريا أجمل شيء في حياتي ..

بس معاملة الموظفيين و بعض المعنترين فيها و بيستقوا على هالناس ... خليتني أضطر أسفاً أهرب من البلد , لا أكاد أصدق أنني أقولها ..... لن أرجع لسوريا أبداً :(

[root]

سوريا أجمل شيء في حياتي ..

بس معاملة الموظفيين و بعض المعنترين فيها و بيستقوا على هالناس ... خليتني أضطر أسفاً أهرب من البلد , لا أكاد أصدق أنني أقولها ..... لن أرجع لسوريا أبداً :(

إن شاء الله بترجع ع البلد بالسلامة و بكامل حريتك

قول يا رب

[raghadkh]

انا صح مالي سورية اصلا وعايشة هون بس ما بعتبر حالي مغتربة هون ابدا انا ولدت بسوريا وعشت بسوريا ومالي ناوية اتركا
هون بتحس في شي غريب عنجد متل ما بيقولو اللي بيشرب مية الشام ما عاد يقدر يفارقا يعني برغم الصعوبات الكتييرة واللي معروفة بالنسبة للكل بعتقد و بحكم وضعي فيني اطلع ادرس وين ما بدي بس للحظة ما فكرت اني اترك هالبلد
ولا بحياتي رح فكر يعني مشوار بحارات باب توما بيخليني انسى كل الصعوبات اللي عم واجها هون واللي اغلبها بالكلية و كيف الكل عم يحاول ياثبت وجودو عحسابنا وعحساب اعصابنا

[Trojan]

انا صح مالي سورية اصلا وعايشة هون بس ما بعتبر حالي مغتربة هون ابدا انا ولدت بسوريا وعشت بسوريا ومالي ناوية اتركا
هون بتحس في شي غريب عنجد متل ما بيقولو اللي بيشرب مية الشام ما عاد يقدر يفارقا يعني برغم الصعوبات الكتييرة واللي معروفة بالنسبة للكل بعتقد و بحكم وضعي فيني اطلع ادرس وين ما بدي بس للحظة ما فكرت اني اترك هالبلد
ولا بحياتي رح فكر يعني مشوار بحارات باب توما بيخليني انسى كل الصعوبات اللي عم واجها هون واللي اغلبها بالكلية و كيف الكل عم يحاول ياثبت وجودو عحسابنا وعحساب اعصابنا

حبيت اشكرك كتابيا
لانو حسيت انو هيك أحسن من زر الشكر
وعنجد شي غريب انو كيف بتقدر الناس تحكي هالحكي (((مهما))) كان السبب

شكرا مرة تانية

[أبوحميد]

وعنجد شي غريب انو كيف بتقدر الناس تحكي هالحكي (((مهما))) كان السبب
=====
أنت بتعرفني شلون كنت قبل .. :) لما كنا بالمدرسة
الشي اللي "مهما" اللي عم تقول عليه شي ما بيتحمله بني أدم !