حبيت احكي شوي عن مواد السنة الرابعة فصل تاني -"([{:;برمجيات;:}])"-
اولاً : الملتيديا -الوسائط المتعددة- :
مادة مشتركة للاختصاصات الثلاثة.
على فكرة كنت آخد عنها فكرة سيئة للمادة وسمعتها كانت مو منيحة بس الواقع كان غير هيك
المادة ممتعة كتير وحلوة كتير
يمكن ما تحسو هالشي بقلب السنة لأنها كبيرة وضخمة بشكل كبير (حوالي 1300 سلايد)
بس الابحاث يلي بتتاخد فيها كانت ممتعة -صوت وفيديو وصورة وضغط ومدري شو-
هلأ فيها ابحاث صعبة متل خوارزميات الضغط
وفي طريقة منيحة لدراستها وهي تسجيل المحاضرات بواسطة mp3 player بس يكون تسجيلو راكز
مع ملاحظة شغلة صغيرة
يكون في واحد عم يسجل على دفترو المعلومات التالية
المحاضرة الأولى 30/2/2011 مثلا
قبل البريك : السلايد الأول من 1 -> 50
بعد البريك : السلايد الأول من 51 -> 100 + السلايد التاني من 1 -> 15
وهكذا...
والسبب لهالشي انو كتير من الاحيان كنت حب ارجع اسمع شي فقرة واعد شب نص ساعة دور عليها وبالاخير اعدل عن الفكرة لأنو ما لقيتها.
وكانت طريقة الدراسة مع سماع المحاضرات كتير مفيدة وعن جد لما حاولت ادرس بدون ما اسمع كنت فوت بالحيط لأنو في أبحاث صعبة
طبعاً هالطريقة ما بتكفي لوقت الفحص والسبب انو الدكتور بيشرح الخوارزميات بشكل بسيط -يعني الفكرة العامة للخوارزمية- فلازم يكون في تطبيق عملي عليها (حل شي مسالة مع ارقام).
+
من المفيد الواحد يعمل تلخيص لأفكار هالمادة على وراق خارجية للمراجعة لأنو بعد ما تندرس وإذا الواحد حب يراجع شغلة رح يلاقي ملفات ضخمة ورح يصير صعب التدوير على المعلومة.
المادة مأتمتة.
الحضور مهم جداً جداً جداً.
يفضل إذا طلع بأيدكم تخلو المحاضرات تبع هالمادة يوم التنين أو يوم الخميس.
العملي حلو ماشي حالو بس ما بعرف إذا اساتذة العملي السنة نفسن تبعات السنة الماضية
هو عبارة عن عدة وظايف لكل بحث من ابحاث المادة
ما كانت كتير صعبة وبيزل بالوظايف 4 طلاب.
البرمجة التفرعية:
وهي المادة كانت كمان حلوة -الدكتور صلاح الدوهجي-
وبتذكر انو حضرت كل محاضراتها وحبيتها كتير لهالمادة.
يفضل كمان الواحد يكتب مع الدكتور لأنو السلايدات بتذكر انو كانو مختصرين ولازم يكون في شرح عنن.
الفحص كان على زماننا مأتمت بس الدكتور بتذكر انو قال انو السنة هي رح يغير النمط وما بتذكر شلون قال انو رح يصير.
العملي للأستاذ مضر لكل الاختصاصات
كمان كان العملي حلو كتير
اتعلمنا فيه كيف منستعمل الVM
وبعدين انتقلنا لدراسة الPVM ويلي هي مكتبة برمجية مكتوبة بالسي بتأمن توابع للبرمجة التفرعية.
وفي مشروع واحد غالبا عم يكون مسألة المطلوب برمجتها بشكل تقرعي باستخدام الPVM , MPI
الوظيفة معتة نوعا ما -4 طلاب- ويلي رح ياخد قسم الPVM رح يتعذب شوي صغيرة.
وفي مقابلة بآخر المادة عالوظيفة مع الاستاذ مضر.
التسويق:
مادة ممتعة وسهلة وما في داعي ينحكى عنها
مأتمتة
الدكتور عبد السلام زيدان بيعطيها بشكل حلو وبتنبسطو بمحاضراتو كتير.
الحضور حلو وكنا نحضر لنخلص من ضغط المواد التانية.
العملي محاضرات متل النظري يعني كمان للدكتور نفسو.
هندسة برمجيات 2 -برمجيات-
الدكتور محمد الحجي
بيعطي مواضيع متقدمة بهندسة البرمجيات
بتذكر كان فيها ابحاث متل الDFD و Testing ,Reporting, Risk management, Cost estimate, وفيها كم بحث تانيين نسيت شو كانو
ما بعرف كيف فيني اوصفها.
المادة مالها لا مأتمتة ولا مفتوحة.
العملي عطانا الأستاذ مصطفى علي
وكان في فكرة جديدة انو فيه مشروع كبير بيستمر طوال الفصل
بس الفكرة المميزة بالمشروع انو كل غروب هنن بينقو المسألة يلي بدون يحلوها
يعني هو ما بيعطي مسألة.
كل غروب -4 طلاب- بيقلن حطو مسألة وفرجوني ياها وانا يا بزيد عليها يا اما بقبلها يا اما بقلكم كبيرة...
وبعدين ببلش معكم
اول مرحلة تحليل وجمع المتطلبات وUC
وعليها تقييم
تاني مرحلة Sequence
تالت مرحلة class diagram
رابع مرحلة Deployment , package Diagram
وكل مرحلة تقييمها لحال
وكان في كم مخطط تايين بتاخدوهم وبتطبقوهم ...
كومبايلر برمجيات ...
طبعا مالها فحص نهائي وفحصها هو المقابلة الاخيرة
فيها متل الفصل الأول محاضرات عملي لمتابعة الشغل -الغروب تقريباً 4 طلاب
-ورح تاخدلكم كل وقتكم بالفصل التاني -مع إنو وضعكم احسن بمليون مرة من وضعنا السنة الماضية :P -
في ملاحظة صغيرة
بالفحص الأخير هي المادة بتنزل بالبرنامج انو إلها فحص مع أنو عمليا ما في إلها فحص وإنما مقابلة
بقا فيكم تستفيدة من الوقت يلي بيكون محطوط إلها بمواد تانية -مشان يعني تنتبهو وقت تحطو برنامج الفحص -
ما بعرف يمكن التعى قلبكم من حكيي
لذلك ما عاد احكي شي تاني حاجتكم :)))
